Tist van der Biest geobserveerd…
Kèe ne keer gekeken ip de website van oes maandelijks bloadje: van 28 november verlede joare èst ol lind dat Tist van der Biest iets ‘gepoost’ è. En ’t wo ton nog in combinoatie met de roddelende klokkentoren. È wel, Tistie è op diene loàtste vrijdag van septembre een gloriedag meegemaakt. En kèè de chance gehad veur èm in de goaten t’ouwen, kèè hem dus wa kunn’n ‘observeren’. Jèè hem wreed gejeund, jèè zelfs ip wellicht zijne schoonsten dag van zijn leven nog altijd gezwoor’n van genen alcool te drink’n. Jée ip den dansvloer getoond dat ie verborgen talent’n ee, ie was er zelfs nie van weg te krijgen. Jée gedanst met oud en jong, maar bij die loàtste categorie oa tie tè warm van hem in te spannen. Jée oek een schoonzustere, jée oek nog 2 zusters. Die van de klinieke stond oek vele te dansen. Van leeftijd zit ie nuj averre oalverwege. Jèè dienen avond oek vele kunnen fretten, ik oek. ’t Was zelfs ne Biesteneire die da eten oa geregeld ! En heel den avond en nacht was in het teken van de peirden, best da Woaregem Koerse ol voorbij woa of die beestjes in de paardenmanège een bitse verder gingen nie te vele kunnen rusten in. Jèè nu ondertussen oek een vrouwe, erree ’t ès te zeggen Tist kent dà broaf meiske al langer dan vandage maar ’t woa dees keer officiliër. Jée zelfs een dochtre en de die è zelfs gespietscht veur Tist en zijn vrouwke.
Merci he Tist en co ! ’t Woas in orde. ‘k Woa blie dak uj ne keer ip een andere moaniere èè lééren kenn’n. Kée der van genoot’n.
Ps: vier doagen later woa Tist olwere an ’t werken. Ne echte Woareghemnoare.
